Kompetensia di Haiku 2009

Diploma den man
Drenta avion bai studia
Kòrda bini bèk

Ta ocho di mart
Dia di hende muhé
Pabien rumannan

Skuridat total
Silensio penetrante
Desesperashon

Skupi kandela
Saka stom ku shinishi
Pober pulmonnan

Muhé balente
Fuente di atmirashon
Mustra ken bo ta

Solo a sali
Ban alabá Dios awor
Promesa kumplí

Muhé soltero
Mama i tata pareu
Paga bon tinu

Mama ku tata
Komuniká ku yunan
Famia uní

Tin referèndem
Ban stòp di bringa awor
Ban stima Kòrsou

Viuda hoben

Haiku ganadó:

Viuda hóben
Kaiman na boka di riu
Paga bon tinu

E muhé ideal

8-3-2009

Pabien na tur nos damanan riba dia internashonal
di hende muhé



Muhé.
Kuater lèter formando
un palabra kòrtiku,
ku un nifikashon inmenso.

Kreá pa duna
amor abundante
na tur ku ta rondon’é.

Fuente di sabiduria,
kapas pa soportá
soledat, tristesa i doló.

Reina di su hogar,
ku ta sali na defensa
di esnan ku ta dependé di dje.

Un dama den tur sentido di palabra.
Esun ku ta yena nos
ku hopi orguyo.

Muhé.
Ehèmpel pa hopi hende.
Ta tur dia mester ta:
DIA DI HENDE MUHE!!

Muhé balansá


Muhé, mare mi ta tin
maske ta un kuart
di bo kurashi,
un porshento so di bo grandesa,
djis un tiki di bo spiritu bibu.
Balansa di mi bida
lo tabata mas positivo.

Muhé, mare mi ta tin
maske ta un depchi
di bo outo estima,
un simia minúskulo
di bo sabiduria,
djis un punta di bo diplomasia.
Mi lenga lo ta sa
ki ora keda ketu.

Muhé, mare mi ta tin
maske ta un sneif
di bo disiplina,
un aire leve di bo sinseridat,
djis un suspiro di bo fe inmenso.
E trahe di sumpiña,
pèrtá na mi kurpa,
lo tabata di felpa
i presis na midí.

Mi Valentino

Mi Valentino mi stimabo,
mi n' por keda sin bisabo,
ku mi ke bo asina tantu
ku hasta e ta dunami spantu.

Mi kurason ta bati duru,
ku un amor asina puru,
k'e ta yanami ku alegria
henter anochi i henter dia.

Esta dushi ta pa stima
i sinti kon e amor ta kima
den nos dos su kurason.
Un amor asina grandi
méster ta un bendishon.

Tardesitu

Laman gigante ku ola brutu,
b’a impreshonámi ku bo forsa.
Kargami riba bo lomba hanchu
lagami drumi atmirá
e dia, halando su último rosea,
preparando pa yega
poko poko na su fin.

Laman gigante ku ola brutu,
stòp awor di burdugá.
Bo n’ ta mira ku ya solo
a pinta shelu kompletamente na man?

Tur koló di arko íris
ta tòrna den e nubianan.
Wak nan bon, pasobra djis
skuridat ta guli tur.

Laman awor porfin b’a kalma.
Lagami sigui gosa
ku alma i kurpa
dje arte maestro, kreá pa solo:
un regalo tierno na humanidat,
promé ku e tambe bai sosegá.

Felis dia di San Valentino

Amor pa mama,
amor pa yu.
Amor pa tata,
amor pa bo ruman.

Riba dia di San Valentino,
nos tur ta ekspresá nos mes
ku un flor, un regalo,
un brasa i un sunchi,
pa demostrá nos sintimentu
di amor, rèspèt i amistat.

Stima ku henter bo kurason,
i ku henter bo ser.
Laga kada dia ta un muestra
di kariño, dedikashon i atenshon.

Kòrda semper ku amor ta poderoso.
Amor ta kibra barera.
Amor ta trese pas.
Amor ta trese union.

Candlelight op Curacao!!

Candlelight op Curacao voor Valentijnsdag en later elke dinsdagavond op radio Paradise!