Aña ta bai kaba

Fo’i ora Novèmber parti na dos,

Yoya ta kuminsá sinti un kos.

E n’ por sinta, e n’ por para,

sodó ta kore na su kara.

E ta kuminsá ta manda,

pió ku doño di kualke banda.

“Yuchi, abo ta fèrf den kas,

anto Chichi, laba tur glas.”

Despues e ta bira wak Karina

i mesora e ta bisa:”Laba tur kortina;

Donny, prepará e konfó

pa sensia pone fuku porta ’fó.”

Porfin ta 31 di desèmber,

asina un ham ta freska den un hèmber.

Ayakanan ta kla trahá

i Yoya su lomba bon fahá.

Pasobra awe te anochi di bula kandela,

bula kandela, kai bèk riba suela.

Sensia kurpa pa trese suèltu

i spera ku bida lo dal un mihó buèltu.

Até, nan a tira un dònderbos,

kachónan ta yora manera bestia feros.

Tambú ta zona subi un i tur su preshon,

kontamentu di sekònde tin tur hende su atenshon.

Un áwaseru di klapchi ta zona,

siguí p’e stèm pisá di Ramona:

“Bon aña, bon aña famianan,

ban brasa otro manera ruman.”

Radio ta toka tambú pa zoya,

tur hende ta balia rondo di Yoya.

Te den oranan di mardugá

kada hende ta bai bèk nan lugá,

despues di a deseá otro un biaha mas

bon aña, salú i hopi pas.